CPLP

Responsável CPLP hateten katak "laiha razaun" atu Guiné Ekuatoriál la halo parte iha organizasaun

05 de Fevereiro de 2013, 10:01
Horseik, hafoin hala’o tiha sorumutu ida iha Malabo hamutuk ho Prezidente Teodoro Obiang, Sekretáriu ezekutivu husi Komunidade Nasaun Lian Portugéz (CPLP) hateten katak “laiha razaun” ba Guiné Ekuatorial atu la halo parte iha organizasaun refere.

“Laiha razaun ba Guiné Ekuatorial atu la tama iha CPLP, maibé ita sei servisu hamutuk, maski tempu sei naruk. Só iha tinan 2014 mak foin hatene desizaun kona-ba ne’e. Komunidade ne’e la’os hanesan komunidade ida ne’ebé taka-aan, maibé aberta, tanba ne’e mak ami sei servisu hamutuk ho sira no ho mós kandidatu hirak ne’ebé hakarak atu halo parte”, tuir deklarasaun Murade Murargy nian liu husi via telefónika ba Lusa, hafoin halo tiha reuniaun ho xefe Estadu ekuatu-guiné nian.

“Sorumutu husi kortezia ne’e”, defini hanesan “kordiál no amistozu”, tuir konvite Obiang nian ne’ebé haruka ba responsável CPLP hothotu, ne’ebé hahú halo ona vizita bá nasaun refere iha loron Kinta-feira.

“Prezidente, konvida ha’u atu mai haree situasaun iha rai laran, nomós haktuir mai ha’u kona-ba Guiné Ekuatoriál ninia vontade polítika atu halo parte iha CPLP.

Sira nu’udar kandidatu ba membru plenu direitu, ami mai iha ne’e atu avalia estadu planu asaun, ne’ebé entre ami no autoridade lokál sira sei buka atu hatene no ha’u mai ho intensaun pozitiva ida atu avansa ho planu ne’e”, haktuir Murade.

Murade Murargy hatutan tan katak “sorumutu ne’e kordiál no amistozu tebtebes, hanesan abertura totál husi parte rua”.

"Ami prontu atu ajuda, hodi nune’e sira bele kumpri planu asaun no sei la muda sira ninia polítika atu tama ba CPLP", tenik sekretáriu ezekutivu CPLP.

Guiné Equatorial, hanesan nasaun ida ne’ebé lidera husi Teodoro Obiang desde 1979 no hetan konsiderasaun hanesan rejime ida ne’ebé taka-aan ba mundu, husi organizasaun direitu umanu, ho estatutu nasaun observadór iha CPLP desde tinan 2006, maibé adia fali prosesu adezaun, tanba sei halo hikas fali diskusaun kona-ba ne’e iha simeira organizasaun luzófonu nian, iha Díli, kapitál Timor-Leste, iha tinan 2014.

Iha simeira ikus husi xefe Estadu no governu CPLP, iha loron 20 fulan Jullu tinan 2012 liu ba, adia hikas fali kona-ba Guiné Ekuatoriál ninia adezaun, la hanesan iha tinan rua liu ba ne’ebé la determina prazu atu halo debate hikas fali kona-ba asuntu refere.